МОНГОЛ УЛСЫН ЗАМЫН ХӨДӨЛГӨӨНИЙ ДҮРМИЙН

ТҮҮХЭН ХУВЬСАЛ БА ХАРЬЦУУЛАЛТ

7. Тээврийн хэрэгслүүд хоорондын зайгаа хэрхэн барьж явах тухай

1925 оны дүрэмд:

12. ... өмнөө явсан тэрэгний хойно ойр наалдан явж үл болмой.

1930 оны дүрэмд:

Дугуйн тухай бүлгийн 5. Дугуй бүхий хүмүүс хэсэг бүлгээр бөөгнөрөн хуралдаж бүлэглэн явахад ар араас хоорондоо хоёр метр зайгаар цувран явбаас зохимой.

1936 оны дүрэмд:

- Энэ тухай заалт тусгагдаагүй.

1940 оны дүрэмд:

111. Олон дугуйгаар хамтран явахад хоорондоо 2 метрээс доошгүй зайтай цувран явбаас зохимой. ...

1957 оны дүрэмд:

28. Хоёр талын хөдөлгөөнтэй замаар явахдаа авто хөсөг замын зорчих хэсгийн зөвхөн баруун гар талыг барьж явах бөгөөд цувааны хоорондын зай нь:

а) зам хуурай үед 30 метр;

б) зам нойтон үед 50 метр;

в) цас, мөс хөлдсөн гулгуур замд 100-аас 150 метр байх ёстой.

1960 оны дүрэмд:

24. Хоёр талын хөдөлгөөнтэй замаар явахдаа авто хөсөг замын зорчих хэсгийн зөвхөн баруун гар талыг барьж явах бөгөөд цувааны хоорондох зай нь:

а) зам хуурай үед 20-25 метр;

б) зам нойтон үед 30-35 метр;

в) цас, мөс, хөлдсөн зэрэг халтиргаатай замд 60-80 метр байх ёстой.

1966 оны дүрэмд:

35. Жолооч хөдөлгөөний хурд түүнийг зогсоох бололцоог харгалзан тээврийн хэрэгслийн хажуу хоорондын зайг сонгож авна.

1985 оны дүрэмд:

72. Жолооч урдаа яваа тээврийн хэрэгсэл зогсоход түүнийг мөргөхгүй, хажуу дахь тээврийн хэрэгслийг шүргэхгүй байх хэмжээний хоорондын болон хажуу хоорондын зайг хөдөлгөөний хурднаас хамааруулан сонгож авна.

Тайлбар: 1985 оны дүрэмд тусгагдсан дээрх заалт нь өдгөө хүртэл өөрчлөгдөөгүй хэвээр мөрдөгдөж байна.