Засгийн газрын дэргэдэх Цагдаагийн ерөнхий газрын

даргын 1991 оны б/175 тоот тушаалаар батлав.

МОНГОЛ УЛСЫН ЗАМЫН ХӨДӨЛГӨӨНИЙ ДҮРЭМ

(Цагдаагийн ерөнхий газрын даргын 1993 оны 88 тоот тушаалаар

оруулсан нэмэлт өөрчлөлтүүдийг тусгав)

ТАВДУГААР БҮЛЭГ

ЗАМЫН ХӨДӨЛГӨӨН ЗОХИЦУУЛАХ ДОХИО

Гэрлэн дохио

48. Замын хөдөлгөөн зохицуулахад улаан, шар, ногоон өнгийн дугуй хэлбэртэй, босоо буюу хэвтээ байрлалтай гэрэл дохио хэрэглэнэ.

Босоо байрлалтай гэрэл дохио нь улаан, шар, ногоон өнгийн дарааллаар дээрээс доош (хэвтээ байрлалтай байвал дээрх дарааллаар зүүн гар талаас баруун гар тийш) байрлана.

49. Босоо байрлалтай гэрэл дохио нь ногоон сум бүхий нэг буюу хоёр нэмэгдэл дохиотой, мөн ногоон гэрэл нь чиг заасан сумтай байж болно. Нэмэгдэл дохио нь ногоон гэрлийн төвшинд байрлана.

50. Гэрэл дохио нь дор дурдсан утгатай байна.

а) ногоон гэрэл дохио нь тээврийн хэрэгсэл буюу явган зорчигчийн хөдөлгөөнийг бүх чиглэлд зөвшөөрнө. Ногоон гэрэл анивчих нь шар гэрэл асах гэж байгааг анхааруулна;

б) шар гэрэл дохио нь гэрэл дохио солигдох гэж байгааг анхааруулж тээврийн хэрэгсэл, явган зорчигчийн хөдөлгөөнийг хориглоно. Ногоон гэрлээр явган хүний гарц буюу уулзварт орсон жолооч шар гэрэл асвал аюулгүй байдлыг хангаж хөдөлгөөнөө үргэлжлүүлэхийг зөвшөөрөх бөгөөд зорчих хэсэг дээр явж байгаа явган зорчигч хөдөлгөөнөө үргэлжлүүлэх буюу аюулгүйн зурвас дээр (аюулгүйн зурвас байхгүй бол замын голд) зогсож дараагийн зөвшөөрөх дохиог хүлээнэ;

в) анивчсан шар гэрэл дохио нь тээврийн хэрэгсэл, явган зорчигчийн хөдөлгөөнийг зөвшөөрөх бөгөөд болгоомжтой явахыг анхааруулна;

г) улаан гэрэл дохио нь тээврийн хэрэгсэл, явган зорчигчийн хөдөлгөөнийг хориглоно. Улаан гэрэл дохиотой хамт ассан шар гэрэл дохио нь түүний хориглох утгыг өөрчлөхгүй бөгөөд ногоон гэрэл дохио асах гэж байгааг анхааруулна.

51. Нэмэгдэл гэрэл дохио нь ногоон гэрэлтэй хамт асаж байвал тээврийн хэрэгслийн хөдөлгөөнийг бүх чигт, улаан гэрэлтэй хамт асаж байвал зөвхөн сум заасан чигт явахыг зөвшөөрнө. Зүүн гар тийшээ эргэх чиг заасан сум нь буцаж эргэхийг зөвшөөрнө.

Улаан гэрэлтэй хамт асаж байгаа нэмэгдэл дохиогоор явж буй жолооч бусад чиглэлээс ногоон гэрлээр яваа тээврийн хэрэгсэлд зам тавьж өгнө.

52. Явган зорчигчийн хөдөлгөөнийг зохицуулахад дээд талдаа улаан, доод талдаа ногоон гэрэлтэй дохио хэрэглэнэ. Энэ гэрэл дохио явган хүний дүрстэй буюу «зогсоорой», «яваарай» гэсэн бичлэгтэй байж болно.

53. Гэрэл дохиогоор зохицуулдаг уулзварын өмнө түрүүлж нэвтрэх эрх олгосон тэмдэг байсан ч жолооч гэрэл дохиог удирдлага болгоно.